Muyeres
Lo que nun principiu yera reivindicar la bayura de la música de percusión del país y el papel de la muyer como protagonista y depositaria de la tradición musical asturiana, tornose nuna de les aventures musicales más apasionantes de los últimos años.
Porque amás de les sos impecables y emocionantes grabaciones – Muyeres , Dancies, bailles, ramos, romances y cantares de los conceyos d’Asturies (FonoAstur, 1993), Muyeres II (FonoAstur, 1997), Pasamentu (FonoAstur, 2001) y Onde la culiebra canta (FonoAstur, 2006) -, caúna d’éstes teníen el reflexu d’un espectáculu nel que s’entemecía tola potencia de la tradición más pura cola maxa del ritu. Porque si daqué vien de les grabaciones de Muyeres, y pendarriba de tou de los sos espectáculos en directu, ye esa verdá ablucante que tien lo que naz no fondero la tierra.
Fragmentu de la ponencia lleída por Inaciu Llope nel branu de 2009 na Universidá Menéndez Pelayo de Santander, col títulu de: La música tradicional asturiana, un averamientu xenealóxicu.
Mientres los años 2010, 2011 y 2012, Muyeres estrenó l’espectáculu INDA SUENEN una producción novedosa n’andecha col grupu teatral Factoría Norte que recibió una gran acoyida de crítica y públicu. Esti espectáculu asitiáu nel discursu de muyer, resulta dafechamente feminista, partiendo sicasí de la música y los valores de la sociedá tradicional.
Los años 2014 y 2015 sirvieron pa facer dos producciones: “MUYERES EN CONCIERTU, 20 años sobre la escena asturiana” y “Muyeres y Morgane Le Cuff”, un consiertu a comuña con esta instrumentista bretona d’harpa celta. Más de 20 conciertos tanto dientro como fuera d’Asturies, sirvieron pa festexar los 20 años de vida col públicu, pasándonoslo bien y revisando la nuestra discografía durante los dos últimos años, repasando 50 temes sobre los escenarios.
Si dalgo quisiéremos destacar na hestoria de Muyeres, ye la recuperación y interpretación de más de 200 cantares qu’amuesen la fuercia de la percusión y la voz interpretada por muyeres y tamién aquelles otres interpretaciones de les que la muyer ye portadora na tradición, a capela o acompañándose con instrumentos como la gaita, vigulín, zanfona, clarinete o curdión de botonera que, les más de les veces, taben nes manes de los homes como músicos profesionales. Asina, lo nueso ye ganar espacios que nun mos yeren permitíos y sacar la música de los ámbitos cotidianos de les cocines y los filandones.
Muyeres siéntese particularmente arguyosa del trabayu que fizo na obra sinfónica KELTHIKÉ de Ramón Prada y de la participación y conciertos con Hevia nel esitosu trabayu discográficu “Tierra de nadie”. Tamién de tocar en delles ocasiones nel Festival Interceltique de Lorient y de cantar y trabayar xunto a músicos de la talla de Xuacu Amieva, Tejedor, Emilio Martínez, David Varela, Pedro Pangua, Igor Medio, Marga Lorences, Xuan Nel Expósito, Indalecio Santos, Ramsés Ilesies, Elías García, Inés González o Llorián García, y coles harpistes Morgane Le Cuff y Mirian del Río o cola Banda Gaites de Castrillón, Lorena Álvarez y su Banda Municipal o el grupu de rock La Bande, col que tamién grabamos nel so primer trabayu discográficu.
Muyeres prepara un nuevu espectáculu pa estrenar na primavera de 2016. Nél pretendemos dar un pasu más por facer una propuesta escénica y musical diferente, actualizando’l discursu de la música tradicional y averándolu a tola sociedá con una propuesta social, de xéneru y pola igualdá, partiendo de les grabaciones de los primeros investigadores que vinieren a Asturies a recoyer testimonios direutos de la tradición oral, alrodiu de los años 50 del sieglu pasáu y más concretamente en 1952. Ellos fueron: Alan Lomax, Constantin Brailoiu, Manuel García Matos y Kurt Schindler.
Anguaño somos 28 persones de d’estremaos llugares d’Asturies y, ente canción y canción, pretendemos y buscamos al traviés de la música, emocionar y tresmitir divirtiéndonos. Nun somos profesionales, pero tamos enfotaes na tresmisión del patrimoniu musical y por él damos el tiempu que tenemos y el que nun tenemos. Si dalgo tamos arguyoses, ye de que a lo llargo de 22 años d’esistencia, formaron parte del grupu más de 150 muyeres y collaboradores que güei participen o dirixen munches asociaciones, grupos o escueles de música tradicional y que son una bona parte de la hestoria viva de la música asturiana.